Samkvæmt samkomulagi um styttingu vinnuvikunnar sem hefur náðst milli BSRB og viðsemjenda bandalagsins hjá ríkissáttasemjara í gær gæti starfsfólk í vaktavinnu stytt vinnuviku sína allt niður í 32 stundir.

Þetta kemur fram í tilkynningu frá BSRB sem fékk heimild til að greina stuttlega frá samkomulaginu, þrátt fyrir trúnað um kjaraviðræður.

Styttingin verður hluti af kjarasamningum þeirra aðildarfélaga BSRB sem semja við ríki og sveitarfélög, en er gert með fyrirvara um að samkomulag náist um önnur atriði sem út af standa.

Þessi stytting vinnuvikunnar mun ekki hafa í för með sér launaskerðingu og er um að ræða mestu vinnutímabreytingu á íslenskum vinnumarkaði í nær hálfa öld.

Í tilkynningu BSRB segir:

Almennt fylgir því ekki kostnaður að stytta vinnuvikuna hjá dagvinnufólki. Eins og sýnt hefur verið fram á með tilraunaverkefnum geta vinnustaðir náð saman um að fara yfir skipulag vinnunnar til þess að stytting úr 40 stundum í 36 gangi upp án þess að kostnaður hljótist af.

Það sama á ekki við um vinnustaði þar sem unnið er á sólarhrings vöktum, enda þarf að manna ákveðin stöðugildi til að halda uppi óskertri þjónustu. Það er því ljóst að kostnaður sem lendir á launagreiðendum á þeim vinnustöðum getur verið verulegur.

Útfærslan á styttingu vinnuvikunnar hjá vaktavinnufólki verður kynnt í smáatriðum þegar kjarasamningar hafa náðst, en í stuttu máli má segja að verið sé að umbreyta verðmætum sem þegar eru til staðar í launamyndun. Búinn er til hvati til að vinna fjölbreyttar vaktir með hliðsjón af öryggi, heilsu og jafnvægi vinnu og einkalífs.

Grunnstyttingin verður úr 40 stundin í 36, eins og hjá dagvinnufólki en svigrúm verður til að stytta vinnuvikuna enn frekar hjá vaktavinnufólki, einkum hjá þeim sem vinna kvöld, nætur og helgarvaktir en þá getur vinnuvikan styst allt niður í 32 tíma.

Áfram verður greitt vaktaálag fyrir vinnu utan dagvinnutíma en álag á á næturvöktum verður hækkað. Nýr launaflokkur, vaktahvati, verður greiddur til að umbuna betur fyrir þegar fólk er að mæta á fjölbreyttar vaktir.