Sigurður Ingi Jóhannsson, samgönguráðherra, hyggst láta breikka Reykjanesbrautina á hættulegum kafla þar sem banaslys varð á dögunum, á undan áætlun. Kemur breikkunin til framkvæmda á fyrsta tímabili samgönguáætlunar, sem er frá 2020 – 2024, en fyrri áætlanir gerðu ekki ráð fyrir breikkun/tvöföldun fyrr en að fimm árum liðnum. Sigurður Ingi greinir frá þessu á Facebook:
„Í mínum störfum sem samgönguráðherra hef ég sett umferðaröryggi í forgang þegar kemur að uppbyggingu í samgöngum. Undanfarið hef ég átt fundi og samtöl við fulltrúa Vegagerðarinnar, Hafnafjarðabæjar og álversins í Straumsvík. Nýjar forsendur á útfærslu á tvöföldun Reykjanesbrautar eru komnar fram í nýútkominni frumdragaskýrslu Vegagerðarinnar og Mannvits. Þar kemur fram að hagkvæmast er að breikka Reykjanesbrautina, frá gatnamótum við Krýsuvík að Hvassahrauni, í núverandi vegstæði og einfalda fyrri útfærslur sem kallar jafnframt á breytt aðalskipulag. Ég mun beita mér fyrir því að aðilar vinni málið út frá þeim forsendum sem nú liggja fyrir. Náist farsæl lending verður hægt að flýta og ljúka framkvæmdum við Reykjanesbrautina frá gatnamótum við Krýsuvík að Hvassahrauni á fyrsta tímabili samgönguáætlunnar.“