Í síðustu viku var Henrik Kristensen dæmdur í tveggja ára fangelsi af Vestri-Landsrétti í Danmörku. Hann var sakfelldur fyrir að hafa ræktað 22.000 hampplöntur á ökrum sínum í Frøstrup í Thy og að hafa ætlað að framleiða marijúana.

TV2 skýrir frá þessu. Hann hafði gert sitt besta til að leyna ræktuninni því hann hafði plantað maís allt í kringum hampinn. En eitthvað virðist hann hafa misreiknað sig því hampplönturnar spruttu svo vel að þær urðu fljótt hærri en maísinn og það vakti athygli lögreglunnar.

Í undirrétti var Kristensen dæmdur í eins árs fangelsi en hann áfrýjaði dómnum til Landsréttar sem tvöfaldaði refsinguna.

Kristensen lýsti sig saklausan á báðum dómsstigum og sagðist hafa leigt akurinn út til manns sem hann þekki ekki. Þessu trúðu dómarar ekki.