Sem kunnugt er skilaði Ríkisendurskoðun svartri skýrslu um RÚV í síðustu viku. Meðal þess sem kom fram var að RÚV hefði gert brotlegt við lög, þar sem engin dótturfélög höfðu verið stofnuð utan um samkeppnisrekstur þann er RÚV tekur þátt í.
Stjórnarformaður RÚV, Kári Jónasson, taldi að einhver óvissa hefði þó ríkt um skyldu RÚV um að stofna slík dótturfélög, samkvæmt Fréttablaðinu:
„Þetta er það sem við höfum verið að bíða eftir og nú munum við bara bretta upp ermarnar og í næstu viku munum við setja á stofn vinnuhóp og undirbúa stofnun dótturfélags. Þetta átti að vera tilbúið í vor frá Ríkisendurskoðun en hefur dregist. Við erum mjög fegin að vera loksins búin að fá stimpilinn frá Ríkisendurskoðun.“
Skúli Eggert Þórðarson, ríkisendurskoðandi, tekur þó af allan vafa um meinta óvissu:
„Frá ársbyrjun 2018 hefur það verið alveg skýr lagaskylda að stofna dótturfélag. Ríkisendurskoðun fékk fyrirspurn frá mennta- og menningarmálaráðuneytinu um hvort aðskilnaður væri í bókhaldi. Í framhaldi kom beiðni til embættisins um að kanna fjárhagslega aðskilnaðinn. Ríkisendurskoðun hóf stjórnsýsluúttekt í framhaldinu sem tæki til fjármögnunar, reikningsskila og samkeppnisreksturs RÚV hinn 11. desember 2018. Vorið var ekki sérstaklega til umræðu. Fyrstu gögn frá RÚV bárust í janúar 2019 og fyrstu skýrsludrög voru til meðferðar hjá RÚV um mánaðamótin maí-júní. Í kjölfarið kom mikið gagnamagn frá RÚV.“
hefur Fréttablaðið eftir Skúla, en síðustu athugasemdir RÚV bárust í lok október, en skýrsludrögin voru send út til umsagnar í september.
