Alls var 2.6 milljóna króna hagnaður á rekstri Sósíalistaflokks Íslands á síðasta ári samkvæmt útdrætti ársreiknings flokksins sem birtur er á veg Ríkisendurskoðunar.

Tekjur flokksins námu 6.2 milljónum og útgjöldin voru 3.6 milljónir.

Félagsgjöld og framlög lögaðila og einstaklinga stóðu að mestu undir tekjulið flokksins, en þar munar mest um þá Kára Stefánsson, forstjóra Íslenskrar erfðagreiningar og Sigurð Pálmason, sem gáfu 250 þúsund krónur til flokksins.

Líklega er um Sigurð Gísla Pálmason að ræða, áður kenndan við Hagkaup og síðar IKEA, en hann var einn eigenda Fréttatímans þegar stofnandi Sósíalistaflokksins, Gunnar Smári Egilsson réði þar för.

Alls námu framlög einstaklinga undir 200 þúsund krónum alls rétt rúmum þremur milljónum.

Frá lögaðilum fékk flokkurinn um 900 þúsund frá Reykjavíkurborg í formi kosningastyrks og 250 þúsund frá félaginu Forvörnum og eftirliti ehf. Tekjur flokksins af viðburðarhaldi námu tæplega einni og hálfri milljón.

Sósíalistar náðu inn einum manni í borgarstjórnarkosningunum í fyrra með 6.4% atkvæða og eru þar eini flokkurinn sem ekki á fulltrúa á Alþingi.