Oddi Einarssyni, framkvæmdastjóra kirkjuráðs þjóðkirkjunnar, hefur verið sagt upp störfum. Kirkjuráð samþykkti einróma að segja upp samningi Odds á kirkjuráðsfundi þann 2. október. Lætur Oddur af störfum þegar í stað. Morgunblaðið greinir frá.

Samkvæmt fundargerðinni framsendi biskup Íslands tölvupóst til kirkjuráðs frá fjármálastjóra biskupsstofu, frá því 23. ágúst, þar sem kvartað var yfir framkomu Odds í garð verkefnastjóra fjármála sókna á Biskupsstofu.

Morgunblaðið greinir frá því að samkvæmt Biskupsstofu muni Oddur ekki vinna uppsagnarfrestinn og unnið sé að semja við hann um starfslok, en Oddur verður 67 ára í janúar. Ekki er búið að ráða staðgengil.

Um starfsemi kirkjuráðs segir á vef þjóðkirkjunnar:

„Kirkjuráð þjóðkirkjunnar fer með framkvæmd ýmissa sameiginlegra mála og verkefna samkvæmt lögum og starfsreglum.

Kirkjuráð er undir forystu forseta ráðsins sem er biskup Íslands. Þá kýs kirkjuþing tvo leikmenn og tvo guðfræðinga í ráðið til fjögurra ára. Helstu verkefni ráðsins eru að stýra starfi kirkjumálasjóðs, sem m.a. á öll prestssetur landsins, embættisbústaði biskups Íslands og vígslubiskupa svo og Kirkjuhúsið þar sem yfirstjórn kirkjunnar er til húsa. Enn fremur stýrir ráðið kristnisjóði og úthlutar árlega úr Jöfnunarsjóði sókna. Kirkjuráð undirbýr fundi kirkjuþings og fylgir eftir samþykktum þess undirbýr af hálfu þjóðkirkjunnar tillögur til fjárveitinga til hennar á fjárlögum, hefur yfirumsjón með ráðstöfun fjár sem veitt er af opinberri hálfu til kirkjulegrar starfsemi og hefur forræði og forsjá, ásamt biskupi Íslands, um Skálholtsstað og Skálholtsskóla.“