Alfreð Finnbogason er mættur aftur í verkefni landsliðsins, hann lék síðast með liðinu í mars en hefur glímt við meiðsli. Alfreð er kominn af stað með Augsburg í Þýskalandi en var ónotaður varamaður um helgina.
,,Ég er við hestaheilsu, þetta var ákvörðun þjálfarans. Ég sá þetta sem kærkomið frí fyrir erfitt verkefni,“ sagði Alfreð en íslenska landsliðið mætir Frakklandi og Andorra á næstu viku, báðir leikir á Laugardalsvelli.
Endurkoma Alfreðs tók tíma en það var meðvitað, verið er að byggja líkama hans upp í komandi átök.
,,Það var ákveðið plan í gangi, sem gekk mjög vel. Ég er búinn að æfa í tvo og hálfan mánuð með liðinu, þetta var ekki eins og síðustu ár þar sem ég kem til baka og spila 90 mínútur. Þá ertu að bjóða hættunni heim að eitthvað annað gerist. Ég er ánægður með standið sem ég er í núna, þetta hefur verið slitið síðustu ár. Snýst um fyrir mig að binda saman leiki og koma mér í form.“
Frakkland sem mætir á Laugardalsvöll á föstudag er besta landslið í heimi, hvað eru raunhæfar væntingar að mati Alfreðs?
,,Það fer eftir því hvern þú spyrð, vill maður vera neikvæður, raunsær eða hvað, við setjum upp jákvæðu sólgleraugun. Við höfum unnið stórlið hér heima síðustu ár, það er með jákvæðu hugarfari, ekki neikvæðu. Við þurfum að halda einbeitingu í 90 mínútur.“
Viðtalið við Alfreð er í heild hér að neðan.
Ísland Frakkland: Alfreð Finnbogason – 08.10.19 from DV Sjónvarp on Vimeo.
