Lögmannsstofan Íslög fékk greiddar 100 milljónir frá Lindarhvoli, félags í eigu fjármálaráðuneytisins sem stofnað var til að sjá um sölu ríkiseigna sem ríkið fékk í kjölfar nauðsamninga við föllnu bankana árið 2015, fyrir umsjón með rekstri þess,  samkvæmt frétt Viðskiptablaðsins.

Rekstrarkostnaður Lindarhvols á sama tíma nam 196 milljónum króna, en félagið greiddi Íslögum 80 milljónir fyrir umsjón með rekstri þess, en virðisaukaskattur nam 19 milljónum króna. Var félaginu síðan slitið í febrúarbyrjun í fyrra.

Með virðisaukaskatti nam mánaðarleg greiðsla fjármálaráðuneytisins í gegnum Lindarhvol til Íslaga um fimm milljónum og þá fékk stjórn félagsins 32 milljónir króna á tímabilinu. Kostnaður við endurskoðun og eftirlit nam 43 milljónum samkvæmt samningi við fjármálaráðuneytið.

Vel til þess fallinn

Fjármálaráðuneytið segir í svari sínu til Viðskiptablaðsins að Steinar Þór hafi verið „vel til þess fallinn“ að vinna fyrir Lindahvol, en hann sá um stöðuleikasamninga við átta slitabú sem inntu stöðugleikagreiðslur af hendi til ríkisins, sem og hafði umsjón með móttöku og rekstri eigna frá afhendingu þeirra til ríkisins, samkvæmt frétt VB.

Þá var hann tilnefndur sem áheyrnaaðili í stöðuleikasamningi við Kaupþing ehf.

Eigendur Íslaga eru hjónin Steinar Þór Guðgeirsson hæstaréttarlögmaður og Ástríður Gísladóttir, en Hringbraut greinir frá því að Steinar sé vinur og skólafélagi Bjarna Benediktssonar, fjármálaráðherra, síðan í lagadeild HÍ.

Steinar Þór er fyrrverandi landsliðsmaður í knattspyrnu og spilaði alls 176 leiki í efstu deild með Fram og ÍBV á sínum tíma og skoraði þar 10 mörk en hann þjálfaði einnig Fram liðið á tímabili. Bjarni spilaði sem kunnugt er með Stjörnunni, en á þó engan landsleik að baki.