Á fundi Menningar-, íþrótta- og tómstundaráðs Reykjavíkur í síðustu viku var tekin fyrir umsókn um aðstöðu fyrir pylsuvagn við Sundhöll Reykjavíkur. Víða tíðkast veitingasala við sundlaugar, ekki síst á pylsum, og má nefna Laugardalslaug og Vesturbæjarlaug sem dæmi, en ráðið virðist telja það óheppilegt samt sem áður:
„Ráðið telur ekki heppilegt að hafa pulsuvagn við Sundhöllina. Við bendum á að í nágrenninu eru allmörg kaffihús, veitingastaðir og skyndibitastaðir.“
Engar sérstakar ástæður eru nefndar fyrir þessari ákvörðun ráðsins.
Magnús Már Kristinsson er einn þeirra sem standa að baki umsókninni um pylsuvagninn. Hann sagði við Eyjuna að hugmyndin hafi kviknað þegar hann vann í Sundhöllinni í fyrra og sundgestir, ekki síst ferðamenn, voru að spyrja hvort ekki væri hægt að ná sér í fljótlegan matarbita í nágrenninu:
„Það er greinilega þörf á slíkri veitingasölu á þessu svæði og því finnst mér sorglegt að þetta hafi ekki náð í gegn. Það er bent á í ákvörðun ráðsins að í nágrenninu sé veitinga- og skyndibitastaðir, en staðreyndin er sú að þeir eru ekki þess eðlis sem við höfum í hyggju og ekki það sem fólk er að leita eftir í kjölfar sundferðar, það vill geta fengið sér skyndibita og drifið sig heim, en enginn slíkur staður er í næsta nágrenni við Sundhöllina.“
„Við erum í samstarfi við Ragnar Eiríksson, fyrrverandi yfirkokk á Dill, sem fékk Michelinstjörnu á sínum tíma, því við ætlum að hafa þetta svona ´gourmet´pylsur, sem eru stærri en þessar hefðbundnu íslensku pylsur, þær yrðu sérgerðar fyrir okkur og með sérbökuðu brauði,“
segir Magnús sem ætlar að kalla eftir rökstuðningi og skýringum frá Reykjavíkurborg vegna synjunarinnar, þar sem þarna hafi áður verið pulsuvagn á sama stað, sem og að fordæmi séu fyrir pylsuvögnum við aðrar sundlaugar Reykjavíkurborgar.
Ekki náðist í Hjálmar Sveinsson, formann Menningar,- íþrótta – og tómstundarráðs, né Pawel Bartoszek, fyrrverandi formann ráðsins, við vinnslu fréttarinnar.
