Nýr Herjólfur hefur loksins verið afhentur. Bergþóra Þorkelsdóttir, forstjóri Vegagerðarinnar, tók formlega á móti ferjunni í Gdynaia, Póllandi, í dag.  Hún og stjórnarformaður skipasmíðastöðvarinnar skrifuðu undir tilheyrandi pappíra og samtímis var gengið frá lokagreiðslu og uppjöri.  Þetta kemur fram í frétt Vegagerðarinnar.

Framkvæmdastjóri Herjólfs ohf., Guðbjartur Ellert Jónsson, hefur tekið Herjólf til leigu og er áhöfnin sem mun sigla Herjólfi til Íslands þegar mætt til Póllands, þó nokkra daga muni taka í viðbót til að gera skipið klárt.

Í frétt Vegagerðarinnar segir:

„Afhending Herjólfs hefur tafist nokkuð og er það mikið fagnaðarefni að ferjan sé nú á heimleið og geti hafið siglingar í Landeyjahöfn fljótlega. Nýr Herjólfur ristir nokkuð grynnra en gamli Herjólfur og því þarf ekki að dýpka jafn mikið fyrir nýtt skip. Það mun auðvelda og flýta fyrir dýpkun og ætti að fækka þeim dögum sem ekki er unnt að sigla í Landeyjahöfn.“

Nýr Herjólfur mun sigla fyrir rafmagni alfarið þegar frá líður.

Samið um „lausnargjald“

Skipasmíðastöðin Crist S.A. krafðist 8.9 milljóna evra fyrir Herjólf í febrúar, til viðbótar við umsamið verð, eða sem nemur þriðjungi kaupverðsins. Taldi fyrirtækið að hönnun skipsins hefði breyst í framleiðsluferlinu, sem fæli í sér aukinn kostnað. Upphaflega var samið um að smíðin myndi kosta um fjóra milljarða króna, en „lausnargjald“ skipasmíðastöðvarinnar hljóðaði upp á um 1.2 milljarða króna.

Eftir harðar samningalotur féllst Vegagerðin á að greiða samtals 1.5 milljónir evra, eða um 210 milljónir króna og falla frá kröfu um tafarbætur, sem voru tvær milljónir evra.