Anton Ari Einarsson, markvörður Vals, er sagður vera á leið til Breiðabliks samkvæmt heimildum Fréttablaðsins.
Anton Ari var aðalmarkvörður Vals síðustu tvö sumur en hefur þurft að sætta sig við bekkjarsetu á leiktíðinni.
Hannes Þór Halldórsson var fenginn til Vals fyrir tímabilið og hefur hann staðið á milli stanganna.
Anton neitar því þó að hann sé á förum til Breiðabliks í samtali við Fótbolta.net í kvöld.
„Ég hef ekki fengið neitt samningstilboð frá Breiðabliki og veit ekki til þess að Valur hafi samþykkt tilboð í mig. Ég veit ekkert hvaðan þessar fréttir koma,“ sagði Anton í samtali við Fótbolta.net.
Það verður því fróðlegt að sjá hvað gerist þann 1. júlí þegar félagaskiptaglugginn á Íslandi opnar á ný.
