Breska söngkonan Lily Allen hefur tekið sér frí frá Twitter eftir andstyggilegar athugasemdir netverja. Allen hefur verið ötull talsmaður þess að vel sé gert við flóttamenn og sérstaklega múslima, en sú barátta hefur mætt harðri gagnrýni nettrölla sem hafa látið svívirðingar dynja á henni. Á Twitter sögðust einhverjir efast um geðheilsu hennar. Söngkonan svaraði á Twitter og sagðist vissulega glíma við andleg veikindi, en það jafngilti því ekki að skoðanir hennar væru einskis virði. Allen segist hafa þjáðst af þunglyndi og áfallastreituröskun. Seinna útskýrði hún að veikindin mætti að hluta rekja til þess að sonur hennar lést við fæðingu árið 2010. Ekki varð þessi útskýring til að friða nettröllin og eitt þeirra skrifaði á Twitter að ef söngkonan hefði látið vera að fylla líkama sinn af dópi þá hefði hún ekki misst fóstur. Allen svaraði og sagði að hún hefði ekki misst fóstur. Hún hefði fætt barn fyrir tímann og sonur hennar hefði dáið vegna þess að naflastrengur hans var vafinn um háls hans. Allen tilkynnti síðan að hún ætlaði að taka sér frí frá Twitter, sem kemur sannarlega ekki á óvart.