Mikael Tamar Elíasson gaf í dag út nýtt lag og texta, Örkumla.

Lagið fjallar að sögn Tamars um unga stúlku sem er föst í viðjum fíkninnar og „að vera stödd á þeim stað að eiturtungur fíknarinnar eru orðnar það sterkar og sjálfsmyndin það mölvuð að allar tilfinningar liggja hungurmorða í dyragátt glötunarinnar og borgun næsta skammts er greidd með hálf lömuðum líkamanum.“

Tamar semur lag og texta, Vignir Snær Vigfússon spilar á gítar og bassa og sér um útsetningu. Þorvaldur þór Þorvaldsson er á trommum og Kjartan Valdemarsson á píanó/hammond.

„Ég sendi Vigni Snæ skilaboð í fyrra og sagði honum að ég væri með lag sem mig langaði rosalega til þess að gera eitthvað við,“ segir Tamar um tilurð lagsins. „Hann bað mig um að senda sér það og fljótlega fékk ég svar til baka þar sem hann sagði: „Klárlega, við gerum eitthvað með þetta“

„Vignir Snær tók þetta einfalda gítarspil sem ég sendi honum og gerði það að fullvaxta lagi og ég er ótrúlega ánægður og þakklátur með útkomuna, maðurinn er snillingur!“