Alþjóðaheilbrigðismálastofnunin WHO hefur sent frá sér viðvörun vegna mislingafaraldra sem herja víða um heim þessar vikurnar og gerðu allt síðasta ár. Stofnunin segir að „þetta muni kosta mannslíf“. Stofnunin gagnrýnir seinagang yfirvalda í mörgum ríkjum í baráttunni við mislinga og fyrir bólusetningum sem og andstöðu við bólusetningar en hún fer víða vaxandi.

WHO segir að mislingatilfellum hafi fjölgað um helming á síðasta ári miðað við 2017. Talið er að um 136.000 manns hafi látið lífið af völdum sjúkdómsins á síðasta ári. Börn eru stór hluti hinna smituðu og látnu.

Barnahjálp Sameinuðu þjóðanna, Unicef, segir að það sé falleinkunn fyrir heimsbyggðina að í 98 ríkjum fjölgaði smittilfellum á síðasta ári.

„Þetta er ákall um að heimurinn vakni. Við eigum örugg, áhrifarík og tiltölulega ódýr bóluefni gegn þessum bráðsmitandi sjúkdómi. Bóluefni sem hefur bjargað næstum milljón mannslífum á síðustu tveimur áratugum.“

Segir Henrietta Fore hjá Unicef.

Það eru tíu ríki sem standa að baki þremur fjórðu hlutum aukningarinnar í smittilfellum segir WHO. Þeirra á meðal eru Frakkland, Úkraína, Filippseyjar og Brasilía.

Mislingar eru bráðsmitandi en auðvelt er að koma í veg fyrir þá með bólusetningum. Andstaða við bólusetningar hefur færst í aukana. Sífellt fleiri efast um ávinning bólusetninga og aðrir hafa án, nokkurra vísindalegra sannana, bent á að tengsl séu á milli bólusetninga og einhverfu.

WHO lýsti því yfir í síðasta mánuði að andstaða við bólusetningar væri á topp tíu listanum yfir mestu hætturnar sem steðja að lýðheilsu jarðarbúa.