Það eru engin ný tíðindi að ofbeldisverk séu framin í Mexíkó en morðtíðnin þar er ótrúlega há og fer hækkandi ef eitthvað er. Morðin eru talin í tugum þúsunda á ári hverju. Morðmál þurfa því eiginlega að vera ansi sérstök til að vekja athygli þar í landi. Það á við um málið sem hér er sagt frá.

Í síðustu viku fannst kvenmannshöfuð í ruslapoka. Við hlið höfuðsins var miði með eftirfarandi skilaboðum: „Hún var myrt af því að maðurinn hennar vildi ekki greiða lausnargjaldið.“

Einnig stóð: „Þetta gerðist af því að maðurinn minn vildi vera töffari og ekki greiða lausnargjaldið.“

Konan sem um ræðir hét Susana Carrea. Höfuð hennar fannst á bílastæði í bænum Coatzacoalocos í Veracruz. Henni hafði verið rænt viku áður þegar hún var á leið til að sækja dóttur sína heim til vinar. New York Post skýrir frá þessu.

Á myndbandi, sem var birt á Twitter, sést Carrera fyrir utan hús vinarins. Skyndilega aka mannræningjarnir upp að henni og draga hana inn í bíl sinn.

Þeir kröfðust 4 milljóna pesos, sem jafngilda um 25 milljónum íslenskra króna í lausnargjald. Fjölskylda Carrera sagði í samtali við dagblaðið Heraldo de Mexico að hún hefði ekki efni á að greiða svona hátt lausnargjald.

Carrera og eiginmaður hennar eiga álfyrirtækið Pexaluminio.