Það eru örugglega ekki margir sem hafa heyrt um Bramble Cay melomys, sem eru eða öllu heldur voru lítil nagdýr. Þau lifðu á lítilli eyju nærri Papúa Nýju-Gíneu. En nú eru þessi litlu nagdýr útdauð og hafa öðlast þann vafasama heiður að vera fyrsta spendýrið sem varð hnattrænni hlýnun, af mannavöldum, að bráð.

CNN skýrir frá þessu.

Eyjan, sem dýrin bjuggu á, er aðeins fimm hektarar og liggur á milli Queensland í Ástralíu og Papúa Nýju-Gíneu. Á áttunda áratugnum voru mörg hundruð dýr af þessari tegund á eyjunni. 1992 hafði dýrunum fækkað mikið og yfirvöld lýstu tegundina í útrýmingarhættu.

2016 hafði ekkert dýr þessarar tegundar sést í 10 ár og því lýsti háskólinn í Queensland hana útdauða. Nú hafa áströlsk yfirvöld fylgt í fótspor háskólans og lýst tegundina opinberlega útdauða.

Í skýrslu háskólans í Queensland frá 2016 segir að útdauði tegundarinnar sé líklegast vegna hækkandi sjávarborðs sem hafi minnkað það landsvæði sem dýrin höfðu til að lifa á.