„Þetta hefði getað endað illa,“ segir Valdimar Guðmundsson söngvari sem ákvað fyrir rúmu ári að taka á sínum málum en hann var þá orðinn allt of þungur. Valdimar segir að botninum hafi verið náð þegar hann, fyrir rúmu ári, var með væga lungnabólgu og átti hann erfitt með andardrátt á meðan hann svaf. Ítarleg viðtal má finna við Valdimar í blaðinu heilsa sem fylgir Morgunblaðinu í dag.

„Mig dreymdi alla nóttina að ég væri að kafna og vaknaði sveittur og lúinn og hugsaði með mér að þetta hefði getað endað illa. Þetta var botninn hjá mér og sparkið í rassinn sem ég þurfti til að koma mér af stað.“

Valdimar segir að staðan sé allt önnur. Einn af þeim sem er Valdimar innan handar er Tómas Guðbjartsson eða lækna Tómas eins og hann er oft kallaður. Segist Valdimar gera hlutina á sínum hraða og gæta þess að fara ekki út í neina öfga. Árangurinn hefur ekki látið á sér standa.

„Ég er búinn að missa eitthvað í kringum 40 kíló. Þannig að það er allt í blússandi gangi. […] Ég hef átt slæma daga og vikur hér og þar en lykillinn er held ég bara að vera alltaf að fylgjast með þessu, stíga á vigtina reglulega,“ segir Valdimar og bætir við á öðrum stað:

„Það er orðið auðveldara að skera laukinn, labba út í búð, dansa, bíða í röð og gera alls konar hluti sem eiga að vera svo auðveldir en gátu reynst ansi erfiðir þegar líkamsástandið var upp á sitt versta.“