Óhætt er að segja að lítið myndband sem faðir á Akranesi setti á Facebook-síðu sína hafi slegið rækilega í gegn síðustu daga. Nú þegar hafa 180 þúsund manns horft á myndbandið á YouTube og heldur þeim áfram að fjölga.

Myndbandið sem um ræðir var tekið á aðfangadag af Michal Mogila sem búið hefur á Akranesi síðastliðin tíu ár. Dóttir hans, Maja Paulina, fæddist hér á landi og er sex ára gömul. Michal segir að undanfarið hafi farið að bera á vantrú hennar á jólasveininn og brá hann því á það ráð að búa til myndband til að sanna tilvist hans – og ekki er fráleitt að fullyrða að sú stutta hafi verið hrifin.

Rataði fljótt til Póllands

Michal segir að hann og dóttir hans hafi í sameiningu ákveðið að beina myndavél inn í stofuna á heimili þeirra á Akranesi til að sjá þegar jólasveinninn setur pakkana undir tréð. Og um leið og Maja sá daginn eftir að einhver hafði verið í stofunni krafðist hún þess að fá að sjá myndbandið. Afraksturinn má svo sjá hér að neðan.

Í samtali við DV segir Michal að hann hafi upprunalega sett myndbandið á Facebook-síðu sína þar sem vinir og vandamenn lýstu yfir hrifningu sinni á því og byrjuðu að deila því. Myndbandið var ekki lengi að berast á pólska fréttamiðla sem birtu það og þá hefur það birst á vefsíðunni 9gag. Þegar þetta er skrifað hafa rúmlega 180 þúsund horft á myndbandið og heldur þeim aðeins áfram að fjölga. Breskir fjölmiðlar hafa einnig sýnt áhuga á að sýna myndbandið, segir Michal.

„Þetta er það fallegasta sem ég hef séð um jólin,“ segir einn í athugasemd undir myndbandinu og fleiri taka í svipaðan streng. Michal hefur meðfram vinnu sinni hjá vélsmiðju Þorgeirs og Ellerts á Akranesi mikið dálæti á myndbandagerð og hefur hann til að mynda vakið athygli fyrir glæsilegar loftmyndir af Akranesi.

[youtube https://www.youtube.com/watch?v=iN3P9izcghg&w=560&h=315]