Tveir menn voru handteknir á föstudaginn og úrskurðaðir í gæsluvarðhald en þeir eru grunaðir um innbrot og þjófnað á silfurmunum í september. Verðmæti silfursins er mikið eða sem svarar til um 200 milljóna íslenskra króna. Mununum var stolið úr einbýlishúsi í Gentofte í Kaupmannahöfn.

Lögreglunni tókst einnig að finna þýfið og er það nú aftur á leið til eigandans. Lögreglan hefur farið mjög leynt með rannsókn málsins og skýrði ekki frá gangi hennar fyrr en í gær. Danska ríkisútvarpið hefur eftir talsmanni lögreglunnar að reiknað sé með að fleiri verði handteknir vegna málsins.

Eigandi silfursins hafði lofað þremur milljónum danskra króna í fundarlaun fyrir upplýsingar sem myndu leiða til þess að silfrið myndi finnast. Lögreglan vill ekki upplýsa hvort þau verðlaun verða greidd.