Eva Dögg Guðmundsdóttir og eiginmaður hennar hafa reynt að eignast barn í sex ár án árangurs. Eva hefur þrisvar sinnum orðið ólétt en hefur í öll skiptin misst fóstur og hefur það tekið gríðarlega á þau. Einn fallegan morgun árið 2015 vaknaði Eva og varð ljóst að hana langaði til þess að ættleiða barn og eru þau hjónin í því ferli núna.
Ég er með endómetríósu og pcos, polycystic ovary syndrome, og hef þurft að fara í eina aðgerð vegna þess. Við höfum reynt að eignast barn í sex ár og hef ég meðal annars farið á frjósemislyf en ekkert hefur gengið,
segir Eva og bætir því við að hún hafi alltaf elskað börn og eytt miklum tíma með þeim um ævina.
Ég passaði mikið þegar ég var í framhaldsskóla og hef einnig unnið sem leiðbeinandi barna í þriðja bekk.
Eva bar upp hugmyndina um ættleiðingu við eiginmann sinn en það tók hann örlítið lengri tíma að taka þessa ákvörðun.
En ég gaf mig ekki og var eiginlega óstöðvandi í að skoða ættleiðingarferlið og afla mér upplýsinga. Ég ákvað þó að ræða þetta ekki við hann í nokkurn tíma og leyfa honum að koma með þetta til mín og einn góðan veðurdag var hann tilbúinn. Áður en við vissum af vorum við komin í viðtal hjá Íslenskri ættleiðingu og í kjölfarið fórum við að safna saman öllum pappírum sem við skiluðum svo inn í nóvember árið 2016. Nýlega fengum við viðtal við Barnavernd og erum að fara í viðtal þar í næstu viku og svo munum við fá reglulegar heimsóknir frá þeim og fara í viðtöl og einnig þurfum við að taka sálfræðipróf sem verður þýtt og sent út.
Eva og maðurinn hennar ákváðu að ættleiða barn frá Tékklandi og segir hún að ferlið taki allt frá tveimur og upp í fjögur ár.
Það má því segja að þetta sé löng meðganga ef svo má að orði komast. Við eigum engin börn fyrir og því er þetta barn sem við verðum pöruð við mjög velkomið. Ferlið hefur verið algjör tilfinningarússíbani en við hugsum í lausnum og erum jákvæð með framhaldið. Við erum ekki mikið að vorkenna okkur fyrir að eiga ekki barn núna heldur reynum við að njóta þess að vera tvö á meðan við getum. En við erum afar heppin því við eigum nóg af yndislegum frændsystkinum sem koma nánast daglega í heimsókn eða pössun til okkar. En ég verð að segja að ég er svo spennt eftir því að fá símtalið stóra, þegar að því kemur, að ég get eiginlega ekki beðið.
Eva segir að það hafi hjálpað þeim mikið að fá að fara á fundi og fyrirlestra hjá Íslenskri ættleiðingu sem og að fá að kíkja í heimsókn til fólks sem hefur ættleitt.
Eva tók ákvörðun um að opna sig um ættleiðingarferlið á Snapchat því henni finnst það hjálpa henni að ræða um það opinberlega.
Ég vona að það hjálpi öðrum líka og vonandi sjá fleiri að það er til svo mikið af góðum lausnum til þess að eignast barn og þetta er ein af þeim.
Hægt er að fylgjast með ættleiðingarferli Evu á Snapchat undir notandanafninu: evanadia
