Friðarsúlan í Viðey verður tendruð í 12. sinn með friðsælli athöfn á fæðingardegi John Lennon í kvöld kl. 20. Friðarsúlan mun varpa ljósi upp í himininn til 8. desember sem er dánardagur hans.
Listasafn Reykjavíkur, Borgarsögusafn Reykjavíkur og fleiri halda úti dagskrá sem hefst kl. 17.45 og stendur til kl. 21.
Tónlistarmaðurinn Högni Egils flytur tónlist sína frá kl. 19-19.30 og tónlistarkonan GDRN flytur tónlist sína fyrir gesti frá kl. 20.30-21. Tónleikarnir fara fram í Naustinu við Friðarsúluna.
Yoko Ono býður upp á fríar siglingar yfir sundið. Siglt verður frá Skarfabakka frá kl. 17.30 til 19.30.
Fríar strætóferðir verða frá Hlemmi að Skarfabakka. Fyrsti vagn fer frá Hlemmi kl.17.15 og ekið verður til kl. 19. Fyrsta ferja eftir tendrun Friðarsúlunnar siglir frá Viðey kl. 20.30. Hægt verður að taka strætó frá Skarfabakka að Hlemmi frá kl. 20.40 og þar til lokið verður að flytja gesti úr Viðey.
