Ragga Nagli er klínískur heilsusálfræðingur og einkaþjálfari. Á Facebook heldur hún úti vinsælli síðu þar sem hún birtir reglulega pistla um hreyfingu, mataræði og fleira. Í þessum fjallar hún um að hver og eigi að velja sér mataræði sem hentar viðkomandi.

Föstur. Ketó. LKL. Atkins. Paleó. Danski.

Nú makar megrunarbransinn krókinn á örvæntingu og vonleysi þeirra sem vilja losna við sumarvömbina.

Maríneruð svínarif í útilegunum, óteljandi Apperól spritza í útlandinu og piparhúðaðar lakkrísreimar í rigningardeprimeringu.

Leifar af sumrinu liggja á samviskunni og buxnastrengnum.

Naglinn er ekki lobbýisti neinnar stefnu í mataræði.
Naglinn er heldur ekki andófsmaður neinnar stefnu.

Það sem þú getur haldið þig við til langtíma er það sem virkar.

Naglinn er hinsvegar andófsmaður blekkinga og öfga.

Þegar fólk myndi frekar ganga á kolum en að borða kolvetni af því þau séu spikmyndandi.
Þegar smjörkaffi eða einungis blóðug nautasteik eiga að opna hliðið að lýsisleka.

Það er ekkert magískt fitutap við að borða einungis prótín og fitu.
Það er ekkert magískt við að borða einungis innan ákveðins tímaramma.
Það er engin dulúð í að borða eins og hellisbúi

Eina sem stuðlar að fitutapi er að vera í hitaeiningaþurrð.
Að borða minna en líkaminn brennir.
Ef þú borðar meira en líkaminn brennir þá bætirðu á þig þyngd.

Þegar þú velur mataræði hafðu í huga bragðlaukana, matarsmekk, vinnutímann, lífsstílinn og fjölskylduaðstæður.

Ef mataræðið passar inn í lífið og þú hlakkar til máltíðanna þá muntu halda þig við það mataræði til langtíma.
Ef þú heldur þig við mataræðið dag eftir dag þá muntu sjá árangur.

Sama hvaða nafni það nefnist.

Facebooksíða Röggu nagla.