Bruce Springsteen sendi á dögunum frá sér endurminningar sínar, Born to Run. Bókin hefur vakið mikla athygli, hún er rúmar 500 blaðsíður og Springsteen var níu ár að skrifa hana.

Þar kemur fram að hann átti óhamingjusama æsku, var lagður í einelti í skóla og heimilisaðstæður voru ekki upp á hið besta því faðir hans sinnti honum lítið sem ekkert.

Faðirinn barðist við andleg veikindi sem versnuðu með árunum. „Hann elskaði mig en þoldi mig ekki,“ segir Springsteen í bókinni og segir að allan uppvöxt sinn hafi faðir hans alls sagt minna en 1.000 orð við hann.

Sjálfur á Springsteen þrjú börn og segist hafa lofað sjálfum sér að hann myndi sinna börnum sínum, ólíkt föðurnum. Springsteen hefur þjáðst af þunglyndi og segir að á tímabili hafi allt líf hans stefnt í ranga átt þar sem hann var heltekinn af kvíða. Sálfræðimeðferð og þunglyndislyf hafi gert honum kleift að ná tökum á lífi sínu. Hann þakkar einnig konu sinni, Patti, sem hann hefur verið kvæntur síðan 1991, fyrir að hafa staðið með sér í gegnum alla erfiðleikana.