Fjöldi fólks kom saman í Egilshöll á föstudagskvöld til að fagna nýrri heimildamynd um ævintýri tónlistarmannsins Herberts Guðmundssonar. Myndin ber að sjálfsögðu heitið Can‘t Walk Away sem er vísun í hans þekktasta lag.

Í helgarblaði DV ræddi Herbert meðal annars um myndina sem var fimm ár í smíðum. Árið 2011 nálguðust hann tveir kvikmyndagerðarmenn, Friðrik Grétarsson og Ómar Sverrisson. Þeir vildu gera heimildamynd um manninn sem þekkir poppbransann inn og út og segja frá lífi hans og ferli, sigrum og ósigrum. Herbert ákvað að slá til og var útkoman sýnd í Egilshöll á föstudagskvöld.

Athygli vakti að Herbert hafði ekki séð myndina er hún var forsýnd á dögunum.

„Ég veit bara að hún er sannsöguleg og heiðarleg. Þetta saman mun virka til góðs,“ sagði Herbert.

Popparar Íslands Páll Óskar Hjálmtýsson var brosmildur á föstudagskvöld.

Jafet og frú Fjárfestirinn Jafet Ólafsson og eiginkona hans, Hildur Hermóðsdóttir, skemmtu sér konunglega á frumsýningunni.

Fyrrverandi borgarstjóri Ólafur F. Magnússon, fyrrverandi borgarstjóri, mætti á frumsýninguna. Ólafi er margt til lista lagt en á dögunum sendi hann frá sér sína fyrstu hljómplötu með frumsöndu efni.

Brosmildur í fatla Fjölmiðlamaðurinn Hallur Hallsson var brosmildur að vanda. Athygli vakti að kappinn var með vinstri handlegginn í fatla.

Gaman saman Herbert tók vel á móti hjónunum Jóni Baldvin Hannbalssyni og Bryndísi Schram.