„Auðvitað á stór kona að geta keypt sér flík,“ Þetta segir Hrund Jóhannesdóttir sem lagði leið sína í útsölumarkað 66° Norður á dögunum með því markmiði að kaupa sér yfirhöfn. Hrund sem að passar yfirleitt í stærð xxl mátaði þar regnkápu í sinni stærð en líkt og sjá má á myndinni er flíkin alltof lítil á hana. Markaðsstjóri 66° norður segir tiltekna flík ekki endurspegla stærðir á flíkum frá fyrirtækinu almennt.

Vakti mikla athygli

Hrund sem undraði sig á því hversu illa flíkin passaði deildi myndinni upphaflega á Facebook þar sem hún vakti mikla athygli. Þá skrifuðu margir ummæli við myndina og deildu sambærilegri reynslu af misvísandi fatastærðum hjá 66° Norður.

„Þetta var auðvitað vandræðalegt. Að sama skapi þykir mér eðlilegt að stórar konur geti keypt sér flík rétt eins þær sem nota minni stærðir.“

Hrund kveðst yfirleitt eiga í miklum vandræðum með að finna sér föt við hæfi á Íslandi. „Þegar þú ert komin í svona stóra stærð þá er ósjálfsrátt gert ráð fyrir því að þú sért gömul kona og sniðin eftir því.“

Mynd: Úr einkasafni Hrundar

Þá þykir henni súrt að geta ekki keypt sér regnkápu í 66° norður. En í þetta skiptið líkt og svo oft áður endaði Hrund í herradeildinni.

Efni og snið hafa áhrif

Fannar Páll Aðalsteinsson, markaðsstjóri 66° Norður segir í samtali við DV að þessi tiltekna flík sem Hrund er að máta sé aðsniðinn í hönnun og lítill teygjanleiki í efninu.

„Það er því ekki hægt að segja að þessi tiltekna flík endurspegli stærðirnar hjá okkur almennt.“

Fannar segir að 66° Norður byggi á stöðluðum stærðum frá Evrópu en sniðin séu þó breytileg á milli stíla.

„Efnin og sniðin hafa því alltaf áhrif og stærðir því ekki 100% eins milli stíla.“

Þá segir Fannar að 66° Norður hafi lagt upp með það í gegnum tíðina að bjóða upp á fjölbreytta vörulínu og framleiði marga stíla í stærri stærðum.