„Við vorum í marga mánuði að hittast án þess að það væri alvöru samband. Við vorum búin að þekkja hvort annað í viku þegar það kom í Séð og heyrt að við værum par. Þá vorum við rétt að kynnast. Fyrirsögnin var eitthvað um að Jón Gnarr væri kominn með tengdason, en við höfðum bara húmor fyrir þessu,“ segir fitnessdrottningin Margrét Edda Gnarr í helgarviðtali við Fréttatímann.. Þar ræðir hún um sjálfshatur sem þróaði með sér sem unglingur, einelti og erfið veikindi sem hún glímdi við á síðasta ári.

Margrét Edda er í sambandi við tónlistarmanninn Ásgeir Trausta og segir frá skemmtilegri uppákomu sem faðir hennar, Jón Gnarr, lenti í úti í Bandaríkjunum. Þegar Margrét og Ásgeir Trausti voru að draga sig saman var Jón við það að flytja til Texas þar sem hann bjó um skeið. Hann flutti því út án þess að hitta hinn nýja kærasta Margrétar. Hún greinir frá því að Jón hafi margsinnis verið spurður vestra hvort að hann þekkti Björk sem að hann svaraði alltaf á þá leið að hún væri ein besta vinkona konunnar hans. Dag einn var hann spurður hvort að hann þekkti til Ásgeirs Trausta, enda hefur tónlist hans borist um allan heim. „Já, ég held að hann sé tengdasonur minn,“ svaraði Jón sem eflaust hefur gert viðmælandann gjörsamlega forviða.