„Ég talaði í morgun, eiginlega viljandi, eins og ég væri alltaf að vigta alla dósina. En það var ekki rétt og ég biðst afsökunar á því.“ Þetta segir Elísabet Ólafsdóttir, Beta Rokk, í myndbandi á Facebook seint í gærkvöldi.

Vísir gerði frétt um helgina upp úr öðru myndbandi frá Betu þar sem hún sagðist á hverjum degi í átta ár hafa vigtað skyrdósir frá MS. Þær mælingar sýndu að skyrið væri of lítið, miðað við uppgefið magn. Hún fann út að MS skuldaði sér 12 þúsund krónur.

MS hefur svarað fréttinni og birt nákvæmar niðurstöður mælinga, sem sýna að skyrdósirnar ná alltaf vigt.

Og nú hefur Beta dregið í land. Hún viðurkennir að hún hafi alls ekki alltaf vigtað dósirnar, eins og hún fullyrti áður, og að prófanir á þeim vigtum sem hún á sýni að þær sýni allar of litla þyngd. „Eru bara almennar vigtar, sem seldar eru til venjulegs fólks, bara að vigta of lítið?“ spyr hún hneyksluð.

Hún viðurkennir að hún sé í sjokki. Með fréttaflutningi af málinu hafi þetta farið lengra en hún ætlaði sér. „Ég vil biðja MS innilega afsökunar.“ Hún greinir frá því að hún hafi skorið sig til blóðs á einu lokinu í gær, við vigtun, en hún hafi líklega átt það skilið. Hún hafi um árabil verið örg út í MS að ástæðulausu.

„Ég skammast mín mjög mikið,“ segir Beta sem vonast til þess að MS kæri hana ekki fyrir ærumeiðingar. „Ég ætla aldrei að gagnrýna MS aftur. Þeir eru að vinna vinnuna sína vel – allavega vigta skyrið sitt vel. Ég ætla bara að halda áfram að kaupa skyrið og halda kjafti.“