Síðastliðið laugardagskvöld voru samtals 46 þúsund aðdáendur Justin Bieber mættir á tónleika poppstjörnunnar á Telenor leikvanginum í Oslo.

Norðmenn eru vægast sagt mjög ósáttir við frammistöðu Bieber á tónleikunum. Á vefhluta norska fljölmiðilsins TV2 segir að Bieber hafi verið hálfsofandi á meðan allir aðrir á sviðinu gáfu allt sitt í tónleikana.

Þá segja gagnrýnendur að þegar hann sagði yfir fjöldann að kvöldið væri sérstakt, lífið til þess gert að lifa því til fullnustu og að hann væri þakklátur fyrir að fólk hafi gefið sér tíma til að mæta á tónleikana að hann væri að fara með þaulæfða rullu sem hann væri búinn að fara með einum of oft.

Þá eru margir aðdáendur Bieber ósáttir við hversu mikið af tónleikunum hann „mæmaði.“ Það er sambærilegt því sem margir íslenskir aðdáendur Bieber sögðu eftir tónleikana í Kórnum fyrr í september.

Þá segir í fréttinni að Bieber hafi ekki einu sinni reynt að hafa fyrir því að þykjast vera að syngja.

Þess í stað hafi hann verið með míkrófóninn langt frá andlitinu stóran hluta tónleikanna á meðan rödd hans hljómaði um tónleikahöllina.

Frétt TV2 endar á þessum orðum:

„Bieber, ertu búinn að gleyma því af hverju þú ert listamaður?“