Það var mjög létt yfir Aroni Einari Gunnarssyni fyrirliða Íslands og Heimi Hallgrímssyni þjálfara liðsins á fréttamannafundi í dag. Ísland mætir Króatíu síðasta leik í riðlinum á HM á morgun.
Allt annað en sigur mun senda Ísland heim og sigur gæti ekki dugað, það fer eftir úrslitum í leik Argentínu og Nígeríu.
Sú regla er á fundum FIFA að fréttamaður þarf að kynna sig með nafni og hjá hvaða fyrirtæki hann starfi. Reglan er vegna þess að fundirnir eru oft fjölmennir.
Íslenskir fjölmiðlar eru fámennir og eiga í góðu sambandi við leikmannahópinn, þar þekkja því leikmenn og þjálfarar hvað fjölmiðamenn heita og hvar þeir starfa.
Hörður Snævar Jónsson sem er meðreiðarsveinn minn hér úti ákvað að grínast á fundi dagsins og kynnti sig frá Bleiku og bláu.
Það vakti mikla kátínu hjá Aroni Einari sem átti mjög erfitt með sig. ,,Þessi var góður Höddi,“ sagði Aron Einar við Hörð eftir spurningu hans.
Spurningin snérist svo um endurheimt og Aron svaraði henni eftir að hafa hlegið. ,,Það hefur verið harka í leikjunum, mönnum leið vel fyrir síðasta leik. Mér fannst í dag keyrsla á æfingum, menn eru vel gíraðir. Átök á æfingu, sem virkar alltaf vel að mínu mati fyrir leiki. Ég er á því að menn séu búnir að endurheimta, við erum með bakið upp við vegg. Við gefum allt eftir á vellinum.“
Þegar fundi lokið bað svo Heimir Hallgrímsson um að fá forsíðuna. ,,Verð ég á forsíðunni,“ sagði Heimir léttur.