Aron Jóhannsson var mikið í umræðunni árið 2013 er hann ákvað að leika fyrir bandaríska landsliðið.
Aron gat valið á milli bandaríska eða íslenska landsliðsins en Jurgen Klinsmann vildi ólmur fá framherjann til að leika fyrir Bandaríkin.
Aron tók því boði og fékk í kjölfarið að fara á HM 2014 og varð fyrsti Íslendingurinn til að spila á mótinu.
Það bjuggust fáir við því að Ísland myndi svo tryggja sér þátttöku á HM fimm árum síðar en við lékum einnig á EM fyrir tveimur árum.
Aron ræddi við Yahoo Sport í dag og var á meðal annar spurður hvort hann hefði tekið sömu ákvörðun hefði hann vitað að Ísland kæmist á HM.
,,Það eru allir að segja við mig að ég hefði tekið aðra ákvörðun hefði ég vitað að Ísland væri að fara á HM, bla, bla bla,“ sagði Aron.
,,Hefði ég tekið sömu ákvörðun hefði ég vitað það sem ég veit í dag? Já, ég myndi taka sömu ákvörðun.“
,,Ég myndi segja það sama við fjölskyldu og vini. Að spila fyrir Bandaríkin hefur verið ótrúleg reynsla. Ég hef upplifað frábæra tíma og vonandi verða þeir fleiri.“
