Grínistinn Halldór Halldórsson, betur þekktur sem Dóri DNA, gæti farið út í veitingabransann ef marka má færslu hans á Twitter í gær. Deilir Dóri, sem er matgæðingur mikill, hlekk á sölusíðuna bland.is þar sem verið er að selja stóran Frymaster-djúpsteikingarpott sem myndi sóma sér vel á hvaða skyndibitastað sem er.
„Ég ætla að kaupa þetta. Án djóks,“ skrifar Dóri. Quarashi-stjarnan Ómar Hauksson telur það þjóðráð og leggur til að Dóri setji pottinn á verkstæði grínistans, sem er laghentur mjög. Yfirskriftin frá Ómari steinliggur: „Wings and Wood.“
