Það er óhætt að segja að argentínska pressan hafi ekki verið mjög hrifin af spilamennsku liðsins gegn Íslandi á HM í dag. Þetta var fyrsti leikur argentínska liðsins á HM síðan liðið tapaði úrslitaleiknum gegn Þjóðverjum árið 2014. Og Argentínumenn höfðu litla ástæðu til að gleðjast í dag.
Dagblaðið Ole gefur leikmönnum argentínska liðsins ekki háa einkunn. Lionel Messi fær fjóra í einkunn og Angel Di Maria fær einkunnina 3,5. Um Messi í umfjöllun blaðsins segir meðal annars:
„Klúðaði víti á mikilvægu augnabliki, um það leyti sem Argentína var farin að stíga á bensíngjöfina. Leikmenn í kringum hann voru ekki mikið í að sækja boltann og því féll hann í gamla gryfju, hann fór langt niður á völlinn til að sækja boltann. Við það skapaðist ójafnvægi í argentínska liðinu. Hann gerði miklu minna en fólk býst við af honum.“
Um Angel Di Maria, sem hefur meðal annars spilað fyrir Real Madrid, Manchester United og Paris Saint Germain á ferli sínum, segir blaðið að hann hafi aldrei fundið sig í leiknum. Di Maria var skipt út af um miðjan síðari hálfleik.
Lægstu einkunnina fékk Marcos Rojo, varnarmaður Manchester United, eða þrjá. Segir blaðið að hann hafi verið mjög óöruggur, átt slakar sendingar og sinn þátt í markinu sem Alfreð skoraði.
Einkunnir Argentínu samkvæmt Ole:
Willy Caballero: 5
Salvio: 5
Otamendi: 6
Rojo: 3
Tagliafico: 6
Mascherano: 5
Biglia: 3,5
Meza: 5
Messi: 4
