Bandaríski tónlistarmaðurinn Chris Brown var handtekinn í Los Angeles í gærkvöldi eftir að hálfgert umsátursástand skapaðist við heimili hans. Brown er sagður hafa ráðist vopnaður á konu að nafni Baylee Curran á heimili sínu, en Baylee þessi vann keppnina ungfrú Kalifornía 2016.

Brown er meðal annars sagður hafa miðað byssu á konuna. Lögregla var kölluð á staðinn um miðjan dag í gær að íslenskum tíma, en það var ekki fyrr en eftir miðnætti að lögreglu tókst að handtaka hann eftir að hann gaf sig fram. Er ástæðan sögð vera sú að lögregla hafði ekki húsleitarheimild og Brown hafði engan áhuga á að gefa sig fram við lögreglu. Hann var að lokum leiddur á brott og settur upp í lögreglubíl. Brown virtist rólegur þegar hann ræddi við lögreglu eftir að hann gaf sig fram.

Baylee er sögð hafa dáðst að skartgripum vinar Brown og það virðist hafa farið illa í tónlistarmanninn.

Samkvæmt lögum í Kaliforníu gæti Brown átt yfir höfði sér fjögurra ára fangelsi, en árásir með hættulegum vopnum eru litnar alvarlegum augum þar. Brown komst í fréttirnar fyrir nokkrum árum þegar hann réðist á þáverandi kærustu sína, tónlistarkonuna Rihönnu. Hann var sakfelldur fyrir þá árás og mátti samkvæmt dómnum ekki hafa skotvopn undir höndum. Svo virðist vera sem hann hafi virt bannið að vettugi.