Þingflokkur Pírata hefur lagt fram frumvarp sem gerir það refsivert af ráðherra að gefa Alþingi rangar eða villandi upplýsingar eða leyna upplýsingum í máli sem Alþingi hefur til meðferðar. Frumvarpinu var útbýtt í dag og er Jón Þór Ólafsson flutningsmaður frumvarpsins. Píratar hafa áður lagt fram frumvarp í svipuðum dúr en ekki haft erindi sem erfiði.

Ásta Guðrún Helgadóttir þingmaður Pírata segir þetta eitt af forgangsmálum Pírata, næst stærsta stjórnarandstöðuflokksins á þingi, á kjörtímabilinu:

Það er nauðsynlegt að tryggja upplýsinga og sannleiksskyldu ráðherra í íslenskum lögum. Það er eitt af okkar forgangsmálum á þessu kjörtímabili.

Markmið frumvarpsins verður að festa upplýsingaskyldu ráðherra gagnvart Alþingi betur í sessi, en lög um ráðherraábyrgð ná ekki til ábyrgðar ráðherra gagnvart Alþingi ef hann greinir því rangt frá, gefur því villandi upplýsingar eða leynir það upplýsingum við meðferð máls. Ef frumvarpið verður að lögum mun að einungis taka til ásetningsbrota og brota sem framin eru af stórkostlegu hirðuleysi.

Ari Brynjólfsson – ari@pressan.is