Viðskiptaþing 2017 fer fram á dag á Hilton Reykjavík Nordica frá kl. 13 til 17. Yfirskrift þingsins er Börn náttúrunnar: framtíð auðlindagreina á Íslandi. Nú kl. 13:20 hefst ávarp Katrínar Olgu Jóhannesdóttur formanns Viðskiptaráðs og kl.15 hefst ávarp Bjarna Benediktssonar forsætisráðherra. Bæði ávörpin verða sýnd hér í beinni útsendingu.
Aðalræðumaður er Wal van Lierop, framtaksfjárfestir sem leggur sérstaka áherslu á auðlindageirann. Hann býr yfir fjölbreyttri alþjóðlegri reynslu sem forstjóri, ráðgjafi og fræðimaður. Wal er einn stofnenda Chrysalix sem er kanadískur nýsköpunarsjóður á sviðum nýrra tæknilausna og auðlindanýtingar.
Örmyndbönd verða frumsýnd á þinginu þar sem valinkunnir fulltrúar auðlindageirans þræða áskoranir og tækifæri. Dagný Pétursdóttir, framkvæmdastjóri Bláa lónsins, Gísli Hauksson, forstjóri GAMMA og Helgi Anton Eiríksson, forstjóri Iceland Seafood, munu svo halda örerindi um framtíð auðlindagreina á Íslandi.
Að lokum verða viðfangsefni þingsins rædd af Björtu Ólafsdóttur, umhverfis- og auðlindaráðherra, Þorgerði Katrínu Gunnarsdóttur, sjávarútvegs- og landbúnaðarráðherra og Þórdísi Kolbrúnu Reykfjörð, ferðamála-, iðnaðar- og nýsköpunarráðherra. Viðhorf gesta þingsins verða einnig nýtt inn í umræðurnar með gagnvirkum hætti. Í kjölfar erinda og pallborðs fer fram móttaka þar sem boðið verður upp á léttar veitingar.
Til að horfa á upptökur frá Viðskiptaþingi 2017 er lesendum bent á að smella á Play-takkann efst til hægri á myndbandinu:
