„Það er mjög skiljanlegt að þrýstingur skapist á stjórnvöld að grípa inn í deilu útgerðarmanna og sjómanna. Sá þrýstingur einskorðast ekki við einstaka hópa eða þingflokka, enda hefur verkfallið áhrif á samfélagið allt og langt út fyrir landsteinana. Aðal þrýstingurinn er hinsvegar á deiluaðila að ná samningum. Stjórnvöld eiga að fylgjast vel með á meðan, greina þjóðhagsleg áhrif verkfallsins og undirbúa ólíkar sviðsmyndir. Sú vinna er nú í fullum gangi í ráðuneytunum,“ segir Þorgerður Katrín Gunnarsdóttir, sjávarútvegs- og landbúnaðarráðherra.

Þorgerður Katrín hefur fengið áskoranir um að ríkisstjórnin leggi fram lög á verkfallið og Alþingi grípi þannig í taumana, enda miklir þjóðarhagsmunir í húfi.

„Ég neita því hinsvegar ekki að æskilegt hefði verið að koma ekki að tómu borði hvað þetta ærna verkefni varðar, en verkfallið er auðvitað eldra en ríkisstjórnin sjálf,“ segir Þorgerður Katrín og virðist þannig skjóta á forvera sinn í embætti, Gunnar Braga Sveinsson og ríkisstjórnina sem áður sat.

„Eftir stendur að lausnin liggur hjá samningsaðilum sem ég treysti fyllilega að finna þá lausn sem skynsöm er fyrir sjómenn, útgerðir og þar með samfélagið allt,“ segir Þorgerður Katrín.