Halldór Halldórsson oddviti Sjálfstæðisflokksins í Reykjavík og formaður Sambands íslenskra sveitarfélaga segir að viðbrögðin við umræðunni um kynferðislega áreitni verði að vera þau að læra af umræðunni og að skilja að upplifun hverrar og einnar konu sé hennar persónulega reynsla og það séu röng viðbrögð að gera lítið úr slíkum upplifunum.

Nokkuð hefur borið á því í umræðunni í dag að gert sé lítið úr upplifunum kvenna og að túlka megi margar sögurnar sem misskilning eða óþarfa viðkvæmni gagnvart sakleysislegum athugasemdum. Halldór segir rangt að gera lítið úr reynslu kvenna sem þær svíði undan:

Viðbrögðin verða að vera þau að við lærum af þessari umræðu og skiljum að upplifun hverrar og einnar konu er hennar eigin persónulega reynsla sem svíður undan og því eru röng viðbrögð að gera lítið úr slíkri upplifun eins og því miður hefur orðið vart við nú þegar,

segir Halldór í pistli hér á Eyjunni. Í upphafi stjórnarfundar Sambands íslenskra sveitarfélaga í morgun setti hann málið á dagskrá og samþykkti stjórnin eftirfarandi bókun:

Stjórn Samband íslenskra sveitarfélaga lýsir yfir ánægju með það frumkvæði sem konur í stjórnmálum á Íslandi hafa tekið undir merkjum „Í skugga valdsins“ og hvetur sveitarstjórnir landsins til að taka þátt í umræðu um kynferðisofbeldi og áreiti og hvernig koma megi í veg fyrir slíkt athæfi á vettvangi stjórnmála og á vinnustöðum sveitarfélaga. Nauðsynlegt er að öll sveitarfélög setji sér formlega stefnu og viðbragðsáætlun vegna eineltis, ofbeldis og kynferðislegrar og kynbundinnar áreitni enda er slík hegðun ólíðandi með öllu. Þau sveitarfélög sem ekki hafa gert slíkt eru hvött til að nýta sér sem fyrirmynd stefnu og viðbragðsáætlun sambandsins í þessu efni sem aðgengileg er á heimasíðu þess.
Stjórnin samþykkir einnig að málefnið verði tekið til sérstakrar umfjöllunar á landsþingi sambandsins á næsta ári og verði einnig hluti af því námsefni sem kennt verður á námskeiðum fyrir sveitarstjórnarmenn í kjölfar næstu sveitarstjórnarkosninga.