Guðmundur Gunnarsson, fyrrum formaður Rafiðnaðarsambandsins, gagnrýnir harðlega framgöngu þeirra Bjarna Benediktssonar, fjármálaráðherra og Sigurðar Inga Jóhannssonar samgönguráðherra í fjölmiðlum nýlega, í færslu sinni á Facebook. Bjarni sagði í Kastljósinu í síðustu viku að lífeyrir eldri borgara hefði verið hækkaður í 300 þúsund krónur í sinni tíð sem forsætisráðherra. Guðmundur segir þetta blákalda lygi:

„Nú mæta ráðherrar ríkisstjórnarinnar í hvern frétta- og spjallþáttinn á fætur öðrum með innistæðulausar fullyrðingar og jafnvel blákaldar lygar eins og t.d. fjármálaráðherra sagði í Kastljósinu nú fyrir helgina að lífeyri eldri borgara sé 300 þús. kr. Grunnupphæð ellilífeyris er 240 þús. á mánuði, að auki geta sumir fengið aðrar bætur. Það er svo ótrúlegt hvernig fréttamenn láta ráðherra komast upp með svona rangfærslur. Og að auki þá segja tölur almannatrygginga bara hálfa söguna. Bjarni Ben. og Sigmundur Davíð stóðu að lækkun frítekjumarka og settu 45% skerðingarmörk. Sem var og er fordæmalaust. Króna á móti krónu jaðarskattur á skyldusparnað launamanna er ekkert annað en hrein og klár eignaupptaka sem þekkist hvergi nema á Íslandi og veldur því að ójöfnuður á eykst hér á hverju ári.“

Þá gagnrýnir hann Sigurð Inga fyrir að leggja til vegtolla:

„Samgönguráðherra var svo enn einu sinni að víkja sér undan þeirri staðreynd að það verður ekki komist hjá því að hækka skatta til þess að geta rekið og viðhaldið nauðsynlegum innviðum landsins. Hann vill halda áfram dekri sínu á auðmönnum og leggja sérstakan flatan skatt á höfuðborgarbúa. Eins og hefur komið fram hjá talsmönnum samtaka launamanna þá verður að stöðva aðför ríkisstjórnarinnar að þeim minnst mega sín í þessu samfélagi og það verður gert næsta vetur með þeim verkfærum sem samtök launamanna hafa. Ríkisstjórnin mun ekki komast hjá að hækka veiðigjöldin fyrir afnotin af fiskveiðiauðlind íslensku þjóðarinnar, setja á hátekjuskatt og hækka fjármagnstekjuskatt.“