Vilhjálmur Birgisson, verkalýðsforingi á Akranesi, kemur kollega sínum Ragnari Þór Ingólfssyni, formanni VR, til varnar í pistli á Facebooksíðu sinni í dag. Ástæðan er grein Morgunblaðsins um laun og bifreiðarstyrki formanna og yfirstjórnar VR, en þar segir að laun yfirstjórnar hafi numið 54,2 milljónum á síðasta ári, hækkað úr 42,6 milljónum frá því 2016. Þá voru bifreiðarstyrkir 26,3 milljónir í fyrra, en 17 milljónir árið áður. Fréttin er unnin upp úr ársskýrslu VR en ekki er tiltekinn kostnaður við Ólafíu B. Rafnsdóttur og Ragnar Þór Ingólfsson sérstaklega, en Ragnar tók við af Ólafíu í mars í fyrra.

Vilhjálmur segir greinilegt að nú eigi að koma höggi á Ragnar Þór, þar sem hann hafi staðið hárinu á elítunni sem öllu vilji ráða og stjórna:

„Í þessari frétt er látið í veðri vaka að launakostnaður hafi hækkað umtalsvert eftir að hann tók við formennsku fyrir ári síðan. Hið sanna er að það fyrsta sem Ragnar Þór gerði eftir að hann varð formaður VR var að fara fram á að laun hans yrðu lækkuð úr rúmum 1,4 milljónum í 1,1 milljón eða sem nam 300 þúsundum á mánuði! Í þessari frétt er talað um að launakostnaður formanna sé 26,3 milljónir á síðasta ári en skýringin á því er sú Ólafía fyrrverandi formaður var einnig á launum á síðasta ári. Með öðrum orðum, það voru tveir formenn á launum hjá VR megnið af síðasta ári.“

Vilhjálmur segir að allt verði gert til að brjóta niður vinnu kraftmikils hóps verkalýðshreyfingarinnar:

„Já, sannleikurinn er sá að eftir að Ragnar Þór tók við lækkaði hann laun sín um 3,6 milljónir á ári og mikilvægt er að almenningur átti sig á því. En trúið mér að núna þegar myndast hefur kraftmikill hópur innan verkalýðshreyfingarinnar sem vill, getur og ætlar að segja láglaunastefnunni og fjármálaelítunni stríð á hendur þá mun allt verða reynt til að brjóta það á bak aftur.“