Gísli Eyjólfsson hefur skrifað undir nýjan þriggja ára samning við Breiðablik.

Gísli er einn allra besti leikmaður liðsins og fór hann til reynslu hjá Haugasund í Noregi á dögunum.

Þetta eru góð tíðindi fyrir Blika sem leika í sumar undir stjórn Ágústs Gylfasonar.

Af heimasíðu Breiðabliks:
Þau ánægjulegu tíðindi voru að berast að miðjumaðurinn kraftmikli Gísli Eyjólfsson hefur skrifað undir nýjan þriggja ára samning við knattspyrnudeild Breiðabliks. Gísli sem er 23 ára gamall hefur verið lykilmaður í Blikaliðinu undanfarin misseri. Hann á að baki 71 leik með meistaraflokki Breiðabliks og hefur skorað 13 mörk. Hann lék einnig að láni hjá Haukum í 1. deildinni og spilaði þá 19 leiki og skoraði 1 mark. Einnig lék hann í upphafi móts 2016 nokkra leiki með Víkingi Ó. Í fyrra sló Gísli algjörlega í gegn og átti frábært tímabil.

Árangur Gísla hefur vakið athygli út fyrir landssteinana og hafa mörg erlend lið sýnt honum áhuga. Hann fór meðal annars á prufu til norska liðsins Haugasunds í vetur og einnig hafa önnur erlend lið sýnt honum áhuga. En nú hefur Gísli ákveðið að framlengja samning sinn við Blikaliðið. Hins vegar er líklegt að Gísli fari í atvinnnumennsku ef hann heldur áfram á sömu braut. Við Blikar fögnum því hins vegar að hann hafi framlengt við félagið okkar og vonum að við fáum að njóta krafta hans eitthvað áfram.