Suður-kóreskur karlmaður lét lífið þegar hann varð undir háskólanema sem hafði kastað sér fram af 20 hæða byggingu. Nemandinn verður kærður fyrir manndráp af gáleysi, þótt hann hafi einnig látið lífið.

Yang Dae-jin, 39 ára embættismaður í borginni Gwangju, var á gangi ásamt ófrískri eiginkonu sinni og fimm ára syni fyrir utan bygginguna þegar 25 ára háskólanemi ákvað að taka sitt eigið lif með því að stökkva fram af henni. Svo óheppilega vildi til að háskólaneminn,lenti beint ofan á Dae-jin sem hlaut alvarlega áverka og var úrskurðaður látinn við komuna á sjúkrahús. Neminn lést samstundis við fallið.

Korea Times hefur eftir lögreglumanni að námsmaðurinn verði kærður fyrir manndráp af gáleysi. „Málinu verður hins vegar lokið án ákæru þar sem nemandinn er látinn, en þetta ferli er gert til þess að aðstoða fjölskyldu hins látna að sækja bætur“.

Fjölskylda Dae-jin hefur hins vegar ákveðið að fyrirgefa manninum og ætlar ekki að sækja bætur. Segja þau að hann hafi verið fórnarlamb miskunnarlausrar samkeppni í samfélaginu, en hann mun hafa verið að undirbúa sig fyrir embættismannapróf þegar hann tók sitt eigið líf.