Rannsókn hefur leitt í ljós að ákveðna veiru er að finna í að minnsta kosti 49 dýrategundum, þar á meðal kröbbum og skeldýrum. Hefur veiran fundist í Evrópu, Asíu, Afríku og Ameríku.

WP Tech skýrir frá þessu og segir að þetta þýði ekki að veiruna sé ekki að finna á fleiri stöðum. Vísindamenn rannsaka nú hvort hún geti borist í fólk.

Kínverskir læknar hafa árum saman séð mörg tilfelli af augnsjúkdómi einum sem veldur sýkingu og mjög háum þrýstingi í augum. Í alvarlegum tilfellum geta sjúklingarnir misst sjónina.

Erfitt hefur reynst að finna ástæðuna fyrir sjúkdómnum. Sjúklingar hafa ekki sýnt svörun við þekktum veirum sem valda venjulega augnsjúkdómum.

Í rannsókn, sem var birt í vísindaritinu Nature Microbiology, kemur fram að vísindamenn hafi fundið litlar agnir, sem líkjast veiru, í vef 70 sjúklinga. Þessar agnir fundust ekki hjá heilbrigðu fólki.

Aðrar rannsóknir sýndu að veiran er næstum eins og veira sem er í sjávardýrum. Tilraunir á frumum og dýrumsýndi að hún getur valdið sömu sjúkdómseinkennum og hjá sjúklingunum.

Samtöl við sjúklingana leiddu einnig í ljós að margir þeirra höfðu verið í snertingu við hráan fisk og skeldýr.

Vísindamenn telja því að það séu tengsl á milli veirunnar og augnsjúkdómsins.

Þetta er í fyrsta sinn sem veira úr vatni eða sjó er tengd við sjúkdóm hjá fólki. Engin meðhöndlun er til, enn sem komið er en það er hægt að lina einkennin.