„Hvar á ég að byrja?“ svaraði Þorsteinn Halldórsson landsliðsþjálfari og hló, spurður út í muninn á komandi andstæðingum Íslands, Úkraínu og Spáni.

Ísland mætir Úkraínu 5. júní og Spáni 9. júní í undankeppni HM. Ísland vann fyrri leikinn gegn Úkraínu en tapaði gegn heimsmeisturum Spánar.

„Spánn spilar sinn fótbolta og það er sama hvaða landslið þú horfir á hjá Spáni, kvennaliðið, eða karlaliðið, A-liðið eða unglingalið, þau spila öll eins í grunninn. Possession, tækni, hraði og vilja stjórna leikjum. Þau eru góð á bolta og líður vel með hann.

Úkraína er transition-lið. Þær verjast vel og eru skipulagðar og sækja endalaust í skyndisóknum. Fyrsta hugsun þegar þær vinna boltann er að sækja fram á við, sem er ekki endilega með Spán. Í stórum dráttum myndi ég lýsa þessu svona,“ sagði Þorsteinn á fréttamannafundi í Laugardal í gær um muninn á liðunum.

Leikirnir framundan eru afar mikilvægir, sér í lagi leikurinn gegn Úkraínu ytra. Með því að forðast tap þar tryggja Stelpurnar okkar sér þriðja sæti riðilsins og þar af leiðandi mun sterkari stöðu þegar kemur að umspili um sæti á HM á næsta ári.