Dómstóll í London hefur komist að þeirri niðurstöðu að fyrrum knattspyrnustjórinn John Yems hafi gerst sekur um kynþáttaníð gagnvart leikmanninum Amrit Bansal-McNulty meðan hann lék á láni hjá Crawley Town.

Bansal-McNulty, sem á indverskar rætur, höfðaði mál gegn Crawley Town, QPR og Yems sjálfum eftir að hafa orðið fyrir kynþáttafordómum á meðan hann var hjá félaginu árið 2022. Málið hefur verið tekið fyrir hjá atvinnuréttardómstóli í London í alls 30 daga.

Dómurinn staðfesti þrjár ásakanir um kynþáttaníð gegn Yems. Þar á meðal var atvik þar sem Yems kallaði leikmanninn meðal annars „curry muncher“ og spurði hvort hann væri ósáttur við að pítsur frá styrktaraðila hefðu ekki innihaldið „karrý-pítsu“.

Yems hélt því fram að um „grín“ hefði verið að ræða, en dómurinn hafnaði þeirri skýringu. Crawley Town var talið bera ábyrgð á hegðun stjórans þar sem hún átti sér stað í starfi hans hjá félaginu.

Kröfum leikmannsins gegn QPR var hins vegar vísað frá.

Bansal-McNulty fer fram á um 12 milljóna punda skaðabætur og segir meðferðina hafa valdið sér alvarlegum andlegum skaða og eyðilagt knattspyrnuferil sinn.

Yems fékk áður þriggja ára bann frá enska knattspyrnusambandinu vegna mismunandi kynþáttafordóma og var það lengsta bann sinnar tegundar í sögu enskrar knattspyrnu.