Gagnrýni hefur blossað upp á framleiðslu opinbera HM-boltans frá FIFA eftir að upplýst var að verkamenn sem framleiða boltann fá aðeins um 26 pund í vikulaun, þrátt fyrir að boltinn sé seldur á allt að 130 pund.

Um er að ræða nýja Adidas Trionda boltann, opinberan keppnisbolta Heimsmeistaramótsins, sem er dýrasti opinberi mótsbolti sem framleiddur hefur verið til þessa. Boltinn er skreyttur litum úr fánum gestgjafa mótsins, Bandaríkjunum, Mexíkó og Kanada.

Samkvæmt fréttum er boltinn framleiddur í borginni Sialkot í Pakistan, þar sem framleiðandinn Forward Group greiðir hluta starfsfólks síns lágmarkslaun sem nema um 106 pundum á mánuði.

Anna Bryher, talskona samtakanna Labour Behind the Label, segir stöðuna óásættanlega.

„Það að boltarnir seljist á yfir 100 pund á meðan börn þeirra sem framleiða þá hafa ekki efni á að eignast slíkan bolta sýnir skýrt skort á ábyrgð,“ sagði hún.

Hún kallar eftir því að bæði Adidas og FIFA axli ábyrgð á framleiðslukeðju sinni og tryggi starfsfólki laun sem dugi til mannsæmandi lífs.

Forward Group hefur framleitt um tíu milljónir bolta fyrir komandi Heimsmeistaramót.