Vendingar hafa þó orðið í málinu þar sem lögregla hefur handtekið 59 ára karlmann vegna gruns um aðild að hvarfinu. Nafn hans hefur ekki verið gefið upp opinberlega en fjölmiðlar vestanhafs, þar á meðal AP, greina frá því að um eiginmann hennar, Brian Hooker, sé að ræða.
DV sagði frá málinu í gær en að sögn Brians féll Lynette fyrir borð þegar hjónin voru á leið frá Hope Town til Elbow Cay á laugardagskvöld.
Sjá einnig: Dóttir krefst svara eftir dularfullt hvarf móður sinnar
Samkvæmt frásögn eiginmannsins var Lynette með lyklana að bátnum á sér þegar slysið varð og lýsti hann því að sterkir útfallsstraumar hefðu borið hana hratt frá bátnum. Þar sem hann var ekki með lykla hafi vélin stöðvast og þurfti hann því að róa bátnum í nokkrar klukkustundir að landi.
Dóttir konunnar, Karly Aylesworth, steig fram í viðtölum við bandaríska fjölmiðla í vikunni þar sem hún sagðist efast um frásögn stjúpföður síns.
„Ég skil ekki hvernig hún gat verið með lykilinn að bátnum. Brian er alltaf við stýrið og hefur því vanalega lyklana í sinni vörslu. Þetta passar einfaldlega ekki við það sem ég þekki,“ sagði Aylesworth við CBS News. Kallaði hún eftir því að málið yrði rannsakað til hlítar og benti á að móðir hennar væri þaulvön siglingum.
Í fréttum bandarískra fjölmiðla kemur fram að bandaríska strandgæslan hafi hafið sakamálarannsókn á málinu, þar sem atvikið átti sér stað um borð í báti sem sigldi undir bandarískum fána á alþjóðlegu hafsvæði.
