Þýsku næringarsamtökin mæla með því að sykurneysla sé ekki meiri en tíu prósent af heildarorkuneyslu dagsins. Ef hitaeiningaþörf dagsins er 2.000 hitaeiningar, þá svarar það til um 50 gramma af sykri.
50 grömm virðast kannski vera mikið en það er það ekki þegar betur er að gáð. Hálfur lítri af sykruðum gosdrykk eða 100 grömm af gúmmíböngsum og þá er dagskammturinn kominn. Vogue skýrir frá þessu.
Alþjóðaheilbrigðismálastofnunin WHO er með enn þrengri ramma og segir að ekki eigi að neyta meira en 25 gramma af sykri á dag. Það magn er í einni lítilli jógúrt eða litlu súkkulaðistykki.
Stærsti vandinn er að megnið af sykurneyslu okkar er ómeðvituð. Sykurinn er ekki bara í kökum, sælgæti og gosi því hann er einnig að finna í unnum matvælum og það getur verið erfitt að finna upplýsingar um það á innihaldslistanum.
Lela Ahlemann, læknir, segir að eftirtalin merki sýni að sykurneysla þín sé farin úr böndunum.
Þú ert alltaf svangur – Of mikil sykurneysla hækkar blóðsykurinn en mettar ekki af því að það vantar trefjar í sykurinn. Viðvarandi svengd leiðir til ofáts og þyngdaraukningar.
Óhrein húð og bólur – Sykur eykur insúlínið og magn IGF-1 hormónsins en það örvar fitukirtlana. Þetta getur stíflað svitaholur og ýtt undir bólumyndun og bólgur.
Löngun og skapsveiflur – Eftir að blóðsykurinn stígur fellur hann oft niður fyrir eðlilegt stig. Þetta veldur mikilli sykurþörf og sumir finna fyrir skapsveiflum.
Ónæmiskerfið veikist og bólgur myndast í líkamanum – Sykur, sem smáþarmarnir taka ekki upp, endar í ristlinum þar sem hann örvar bakteríuvöxt. Eiturefni úr þeim geta borist í blóðið og veikt ónæmiskerfið og hraðað öldrunarferlinu.
Húðin eldist hraðar – Mikil sykurneysla veldur því að kollagenið í húðinni skemmist hraðar, gerir vefina stífari og það verður erfiðara að gera við þá og þar með eldist húðin hraðar.
