Guðni Gunnarsson, frumkvöðull og stofnandi Rope Yoga, segir að fólk þurfi oftast að fara á botninn til að raunverulega breytast. Guðni, sem er nýjasti gesturinn í podcasti Sölva Tryggvasonar, segir að það séu í gangi gríðarlega áhugaverðir tímar í heiminum og það hafi aldrei verið mikilvægara en nú að velja hvert maður setur athyglina og taka fulla ábyrgð á eigin tilvist:
„Það er gríðarlega mikil orka í gangi og margt að gerast í heiminum og miklar breytingar og útvíkkanir að eiga sig stað. Það hefur aldrei verið mikilvægara að hvert og eitt okkar setji athyglina á það hvað við viljum, en ekki hvað við viljum ekki. Við vitum að kerfin eru að hrynja og það er margt í óreiðu, hvort sem það eru stjórnmál, heimsmál, heilbrigðismál eða menntamál. Það er gríðarleg upplausn og óreiða í gangi. Þess vegna hefur aldrei verið auðveldara að gagnrýna eða benda á það sem er að, en það er enginn ávinningur í því. Akkúrat enginn. Það sem við getum gert er að skoða hvað við raunverulega getum gert til að bæta hlutina, hvert og eitt okkar. Og svarið er alltaf að taka til heima hjá okkur. Við komumst ekkert undan því mikið lengur á endanum að líta inn á við og taka ábyrgð á okkar eigin tilveru. Það er talað um að það vakni enginn raunverulega til vitundar fyrr en sársaukinn er orðinn nógu hávær. Og núna erum við orðin talsvert aðkreppt í hegðun okkar með neyslu, fjarveru og ánetjunum erum við búin að ýta okkur út í horn. Við erum mörg hver orðin aðþrengd og þar er mjög mikið tækifæri. Þegar maður er orðinn nógu aðþrengdur fær maður að horfast í augu við eigin hegðun. Þegar við erum tilbúin að horfast í augu við hegðunina þá áttum við okkur á því að það er hægt að byrja nýtt upphaf.“
Guðni er mjög afdráttarlaus í sinni nálgun á sjálfsábyrgð og að þar sé svörin á endanum að finna:
„Það getur verið erfitt og stuðandi að heyra þetta, en eina leiðin til að breyta hegðun er að vera heiðarlegur við sjálfan sig og annað fólk. Samfélagið okkar eins og það er núna bælir alla umræðu um ábyrgð. Það er bara spurt hvaða lyf við getum notað eða hvernig kerfið geti bjargað okkur. Við erum að lyfja börnin okkar mjög snemma og svo erum við með þau á spena inni í þessari maskínu sem gengur út á að næra fjarveru og vanheilsu, en ekki heilbrigði. Það er flókið að tala um þetta af því að öflin sem standa vörð um þetta og halda okkur í ótta eru svo vel fjárhagslega studd. Eina leiðin út úr þessu er að við tökum ábyrgð sjálf og séum ekki lengur fórnarlömb eða gíslar inni í þessari sósu allri saman.“
Guðni þekkir þetta sjálfur af eigin raun, enda rak hann sig harkalega á veggi sem ungur maður. Hann tók algjöra u-beygju í lífinu sem ungur maður eftir að hafa verið kominn á ranga braut:
„Ég kem úr umhverfi þar sem voru bæði mikil veikindi og neysla. Foreldrar mínir þjáðust mikið og ég byrjaði mjög ungur í neyslu. Það var mikið kapp í mér og ég bæði reykti og drakk frá unglingsaldri. En sem betur fer áttaði ég mig fljótt á því að ég væri svo ástríðufullur og kappsamur í öllu sem ég gerði að ef ég næði ekki tökum á þessu myndi ég valda mér miklum skaða,“ segir Guðni sem sneri við blaðinu og hefur síðan þá hugsað mikið um bæði andlega og líkamlega heilsu:
„Ég er búinn að hugsa um heilsu nánast síðan ég var barn. En það kom þessi tímapunktur þar sem ég vissi að ég yrði að velja og eftir það var ekki aftur snúið. Á þeim tíma var feimnismál að stunda líkamsrækt eða eitthvað annað en bara hreinræktaðar íþróttagreinar. Þannig að fólk var að fela tækin undir rúmi og þar fram eftir götunum. En það átti svo eftir að breytast og við tók ákveðið blómatímabil í líkamsrækt á Íslandi. Ég hef farið inn í flesta kima heilsubransans, en eftir öll þessi ár nýt ég þess að vera núna með skjólstæðinga sem vilja taka ábyrgð. Fólkið sem kemur til mín núna er komið á þann stað að vera tilbúið að taka ábyrgð og það er blessun að vinna með fólki sem er á þeim stað,“ segir Guðni og heldur áfram:
„Flestir ná ekki að horfast í augu við að það þarf eitthvað raunverulega að breytast fyrr en þeir eru komnir á botninn. Þess vegna verða oft mestu breytingarnar þegar fólk er komið þangað. Þegar fólk vaknar til vitundar og sér að eitthvað sem einu sinni virkaði er löngu hætt að virka, verður næsta skref að taka ábyrgð á því og gera breytingar. Þá opnast fyrir auðmýkt og vilja til að breyta öllum viðhorfum og þá gerast oft magnaðir hlutir. Við höfum flest lent á stað þar sem eitthvað verður að breytast og maður finnur að maður er raunverulega tilbúinn. Í tilverunni er aðallögmálið orsök og afleiðing og það uppskera allir eins og þeir sá.“
Guðni segir að við séum upp til hópa að flýja okkur sjálf meira og minna og það geti varla endað öðruvísi en í þjáningu. Sem betur fer séu þó teikn á lofti um að margir séu að skipta um takt:
„Samfélagið okkar er að sligast af mikilli neyslu, þreytu og sjúkdómum. Við erum ekki komin á endastöð í þeirri þróun, en það eru teikn á lofti um að sífellt fleiri séu að snúa við blaðinu. Þjáningin af völdum þess sem er löngu hætt að virka er að verða nægilega mikil til að fólk leiti inn á við. Við erum oft á tíðum eins og fló á skinni og höldum að við séum hugsanir okkar. Það veldur því svo að það er ekki gott að vera í eigin návist og maður verður friðlaus. Sársauki er óumflýjanlegur, en þjáning er í raun val. Þjáning á sér stað af því að við flýjum það sem er. Það er ekki hægt að flýja hugsanir sínar eða skuggana, en með því að varpa ljósi á þessa hluti byrja þeir að losna. Stærsta vandamál okkar flestra er viðnámið sem við veitum þjáningunni og þannig verður til kvíði. Með því að hafna því sem er búum við til viðnám og viðnámið er yfirleitt miklu stærra vandamál en það sem við erum að hafna. Við getum ekki gefið öðrum það sem við eigum ekki sjálf og þess vegna verður vegferðin að byrja á því að við komum fram við okkur sjálf eins og mikilvægustu manneskjuna í okkar lífi,“ segir Guðni, sem leggur mikla áherslu á það hvernig við tölum við sjálf okkur og aðra:
„Tungumálið okkar er magnað fyrirbæri og það hvernig við notum orð hefur áhrif á heila okkar og líkama. Ef maður notar stöðugt orð sem eru vanmáttug hefur það áhrif á gjörðir okkar. Á því augnabliki sem þú fyrirgefur sjálfum þér að fullu færð þú möguleika á að taka fulla ábyrgð og valda þinni eigin tilvist.“
Hægt er að nálgast viðtalið við Guðna og öll viðtöl og podköst Sölva Tryggvasonar inni á solvitryggva.is.
