Eftir langt ferðalag mætti karlalandsliðið til Queretaro í Mexíkó um helgina, þar sem íslenska liðið mætir Mexíkóum í vináttuleik í komandi viku.
Leikurinn er sem kunnugt er utan hefðbundins landsleikjaglugga og því er hópurinn að mestu skipaður leikmönnum sem eru á mála hjá íslenskum félagsliðum. Þó eru þar einnig Jóhann Berg Guðmundsson, sem varð samningslaus í Sameinuðu arabísku furstadæmunum á dögunum, og Kolbeinn Þórðarson, sem spilar í Svíþjóð.
Ísland og Mexíkó hafa fimm sinnum áður mæst í A-landsliðum karla, í öllum tilfellum vináttuleikir á erlendri grundu. Fyrstu tveimur viðureignunum lauk báðum með markalausu jafntefli og næstu þremur með mexíkóskum sigri. Liðin mættust síðast í lok maí 2021 í Arlington, Texas þar sem Mexíkó vann 2-1 sigur.
Leikurinn, sem fer fram á Corregidora Stadium í Queretaro, hefst kl. 20:00 að staðartíma miðvikudaginn 25. febrúar, sem er kl. 02:00 aðfaranótt fimmtudagsins hér á landi. Leikurinn verður í beinni útsendingu og opinni dagskrá á Sýn.
