James Trafford, markvörður Manchester City, hefur opnað sig um endurkomu sína til félagsins og viðurkennt að hlutirnir hafi ekki þróast eins og hann bjóst við.

Trafford, sem er uppalinn hjá City, sneri aftur til félagsins síðasta sumar í 27 milljóna punda félagaskiptum frá Burnley. Hinn 23 ára gamli markvörður valdi City fram yfir Newcastle eftir að hafa fengið þau skilaboð að hann yrði aðalmarkvörður liðsins, þar sem Ederson var á förum.

Staðan breyttist hins vegar þegar Gianluigi Donnarumma var fenginn til félagsins á lokadegi félagaskiptagluggans. Síðan þá hefur Trafford að mestu setið á bekknum.

Hann fékk sjaldgæft tækifæri í byrjunarliði um helgina þegar City vann 2-0 sigur á Salford City í enska bikarnum. Eftir leikinn viðurkenndi hann ákveðin vonbrigði.

„Það var gaman að spila, en þetta er ekki alveg það sem ég bjóst við fyrir tímabilið,“ sagði Trafford.

„Ég reyndi að búa mig undir allar aðstæður, en þetta er raunveruleikinn. Í hvert skipti sem ég fæ að spila verð ég að gera mitt besta og halda áfram að bæta mig.“

Hann tók þó hrósi fyrir góðar markvörslur með ró. „Við æfum á hverjum degi. Að verja skot er einfaldlega skemmtilegt.“